Is-sharaǵa Syrtqy ister mınıstriniń orynbasary Roman Vasılenko, «Qazposhta» AQ ákimshilik máseleler jónindegi basqarýshy dırektory Baýyrjan Aınabekov, sondaı-aq ATOM jobasynyń Qurmetti elshisi Káripbek Kúıikov qatysty.
Jańa poshta markasy Memleket basshysy Nursultan Nazarbaevtyń bastamasymen iske qosylǵan ıadrolyq qarýdyń joıylýyna qoldaý kórsetetin ATOM (Abolish testing - our mission) jobasyna arnalǵan.
«ATOM jobasy – Elbasy Nursultan Nazarbaevtyń jahandyq ıadrolyq qarýsyzdaný jáne qoǵamdyq dıplomatııa salasyndaǵy mańyzdy bastamasy. Bul bastamany Elbasy 2012 jyldyń 29 tamyzynda «Iаdrolyq synaqtarǵa tyıym salýdan – beıbitshilikke, ıadrolyq qarýdan – erkindikke» atty halyqaralyq konferensııa kezinde kótergen bolatyn», dedi R.Vasılenko.
Sondaı-aq R.Vasılenko Qazaqstanda sheteldik seriktestermen birge ıadrolyq qarýǵa qarsy kúres kúnine arnalǵan iri halyqaralyq sharalar uıymdastyrylatynyn jetkizdi. 29 tamyzdan 1 qyrkúıekke deıin Astanada QR SIM men sheteldik saıası jáne qoǵamdyq-sarapshylyq top ókilderiniń qatysýymen Iаdrolyq synaqtarǵa jappaı tyıym salý týraly shartqa qatysty tórt kúndik konferensııa ótedi.
Jıyn barysynda sóz alǵan K.Kúıikov ATOM jobasynyń maqsaty álemdegi ıadrolyq synaqtardy túpkilikti toqtatý jáne atom bombasynan azat álem qurý jolynda birigý ekenin atap ótti.
«ATOM jobasynyń saıtynda el kóshbasshylarynan ıadrosyz álemdi qurý talap etilgen petısııa ornalastyryldy. Oǵan álemniń 100 elinen 312 myńnan astam adam qol qoıdy. Bizdiń endigi maqsatymyz – 1 mıllıon qol jınaý. Jobanyń www.theatomproject.org saıtyndaǵy petısııaǵa qol qoıýǵa múmkindik bar. Sol arqyly ıadrolyq qarýsyz álemdi qurýǵa úles qosa alasyzdar», dedi K.Kúıikov.
ATOM jobasynyń «Jer betindegi ómir úshin» poshtalyq markasy ofsettik baspamen kók jáne sary tústi boıaýda jasalǵan. Perforasııasy ırek tárizdi, tırajy – 20 000 dana.
Abaı ASANKELDIULY,
«Egemen Qazaqstan»
